kya ishq ke uljhe jaade hain manzil ka kahin par naam nahin
taqdir hai aur tadbir nahin aghaz hai aur anjam nahin
ai ashk machalti chingari tu dard hai ḳhud paigham nahin
ankhon men kabhi palkon pe kabhi tujh ko bhi kahin aram nahin
dam bhar ki hansi dam bhar ki ḳhushi ye bhi to dil-e-nakam nahin
is chalti-phirti duniya men sab kuchh hai magar aram nahin
ye pher mohabbat ke tauba a.in-e-jafa bhi aam nahin
qatil ki chhuri par ḳhuun to hai qatil pe magar ilzam nahin
qismat ki lakiren dekh to len tahrir magar ye aam nahin
is ḳhat ko bhala kyon kar samjhen jis ḳhat men hamara naam nahin
ankhon ke gulabi Doron men ik kaif sa paaya jaata hai
mai-ḳhvar-e-mohabbat hosh men aa saaqi ki nazar hai jaam nahin
duniya ke bhare bazaron men yuun sunta huun apna afsana
jaise ki ye mera zikr nahin jaise ki ye mera naam nahin
ye joshish-e-girya tanha.i ye pichhle pahar ka sannaTa
ashkon men mujhe kah lene do ye ḳhaas hai qissa aam nahin
nazron men tasadum dil men chubhan ik sham.a hai ik parvana hai
donon hi men baten hoti hain avaz ka lekin naam nahin
bijli ki chamak men sho.ale hain phulon ki hansi men aansu hain
ye ‘fazl’ vafa ki duniya hai phir bhi to vafa ka naam nahin
Leave a Reply