Chandrabhan Khayal
zindagani ranj aur gham ke siva kuchh bhi nahin
uf ki har-dam sog-o-matam ke siva kuchh bhi nahin
roz-o-shab apne guzar jaana dayar-e-ghair men
dastan-e-azm-e-mohkam ke siva kuchh bhi nahin
kaun dahshat-gard hai aur kaun hai dahshat-zada
ye sab ik ib.ham-e-paiham ke siva kuchh bhi nahin
gunjti hai ḳhamushi har-dam jo mere char-su
dar-haqiqat shor-e-alam ke siva kuchh bhi nahin
tum jise samjhe ho duniya us ke anchal ke tale
gesuon ke pech aur ḳham ke siva kuchh bhi nahin
dekhta rahta hai bandon par musalsal saḳhtiyan
kya ḳhuda ik ism-e-azam ke siva kuchh bhi nahin
devta si fikr aur tarz-e-amal ke bavajud
aadmi bas ibn-e-adam ke siva kuchh bhi nahin
Leave a Reply