Shahid Jamal
ye din ye raat ye sham-o-sahar sameT liye
ghazal ke shauq ne kitne pahar sameT liye
faza men aisa ta.assub ka zahr phail gaya
na jaane kitne parindon ne par sameT liye
samaj teri marammat na ho sakegi kahin
jo ham gharibon ne dast-o-hunar sameT liye
ye soch kar ki andhere na zindagi ban jaa.en
jahan jahan mile shams-o-qamar sameT liye
bikher paa.e na ham raston men phuul magar
mile jo ḳhaar sar-e-rah-guzar sameT liye
pata bata.ega ab vaqt un ki manzil ka
musafiron ne to rakhte safar sameT liye
samajh men aa ga.i ‘shahid’ agar koi bhi radif
jo qafiya bhi lage mo’atabar sameT liye
Leave a Reply