Main Sach Ko Chhupane Ka Hunar Sikh Raha Hun

maiñ sach ko chhupāne kā hunar siikh rahā huuñ

kartab zarā mushkil hai magar siikh rahā huuñ

raftār-e-ravānī meñ kabhī paañv na roke

ab kaise nibhānī hai Thahar siikh rahā huuñ

rishta simaT rahe haiñ badan phail rahā hai

dehāt se dillī kā safar siikh rahā huuñ

maiñ āstīñ se un ko to be-ghar na kar sakā

kaise utārnā hai zahar siikh rahā huuñ

palkoñ kā bāñdh TuuT ke sailāb na kar de

kis tarah kāTte haiñ nahar siikh rahā huuñ

us ne dikhā.ī aañkh to maiñ ne dī gāliyāñ

kuchh roz se maiñ taur-e-shahar siikh rahā huuñ

urdu zabāñ bhī ghar kī zabāñ hī to hai huzūr

itnā ajiib kyā hai agar siikh rahā huuñ

Leave a Comment