Jata Hai Mere Ghar Se Dil-Dar Khuda-Hafiz

jaata hai mire ghar se dil-dar khuda-hafiz

hai zindagi ab mushkil be-yar khuda-hafiz

vo mast-e-sharab-e-husn ghusse se nihayat hi

khinche hoe aata hai talvar khuda-hafiz

mujh paas tabib aa ke kahne laga ai yaar

be-tarah ka hai is ko azar khuda-hafiz

hasil nahin darman ka vo hai ye maraz jas se

jan-bar na hua koi bimar khuda-hafiz

be-tarah kuchh idhar ko vo mast-e-sharab-e-husn

khinche hue aata hai talvar khuda-hafiz

ai shaikh tu us but ke kuche men to jaata hai

ho jaae na ye subha zunnar khuda-hafiz

Darta huun ki dil har dam malta hai na ho jaave

us chashm-e-sitam-gar ka bimar khuda-hafiz

yuun mehr se farmaya us maah ne vaqt-e-subh

ham jaane hain ab tera ‘bedar’ khuda-hafiz

Leave a Comment