hazar sham.a farozan ho raushni ke liye
nazar nahin to andhera hai aadmi ke liye
ta.alluqat ki duniya bhi aadmi ke liye
ik ajnabi sa tasavvur hai ajnabi ke liye
chaman chaman hai mohabbat jahan jahan se jamal
ye ehtimam hai ik dil ki zindagi ke liye
shab-e-nashat mubarak tujhe ye mah-o-nujum
sahar bahut hai miri kam-sitargi ke liye
nigah-e-dost salamat ki faiz-e-girya se
bahut guhar hain mire daman-e-tahi ke liye
nigah-e-mast ki sahba Tapak rahi hai ‘nushur’
ghazal kahi hai tabi.at ki sarḳhushi ke liye
Leave a Reply