Anjum Saleemi
ye mohabbat ka jo ambar paḌa hai mujh men
is liye hai ki mira yaar paḌa hai mujh men
chhinT ik uḌ ke miri aankh men aa.i to khula
ek dariya abhi tah-dar paḌa hai mujh men
meri peshani pe us bal ki jagah hai hi nahin
sabr ke saath jo hamvar paḌa hai mujh men
har ta.alluq ko mohabbat se nibha leta hai
dil hai ya koi adakar paḌa hai mujh men
mera daman bhi koi dast-e-havas khinchta hai
ek mera bhi ḳharidar paḌa hai mujh men
kis ne abad kiya hai miri virani ko
ishq ne? ishq to bimar paḌa hai mujh men
mere uksane pe main ne mujhe barbad kiya
main nahin mera gunahgar paḌa hai mujh men
mashvara lene ki naubat hi nahin aa paati
ek se ek samajhdar paḌa hai mujh men
ai barabar se guzarte hue dukh tham to sahi
tujh pe rone ko aza-dar paḌa hai mujh men
mera hona mire hone ki gavahi to nahin
mere aage mira inkar paḌa hai mujh men
bhuuk aisi hai ki main ḳhud ko bhi kha sakta huun
kaisa ye qaht lagatar paḌa hai mujh men
Leave a Reply