miri zamin pe lagi aap ke nagar men lagi
lagi hai aag jahan bhi kisi ke ghar men lagi
ajiib raqs ki vahshat ki taal hai jis men
ajiib taal jo aaseb ke asar men lagi
kivad band kahan muntazir the aahat ke
lagi jo der to dahliz tak safar men lagi
tamam khvab the vabasta us ke hone se
so meri aankh bhi bas saya-e-shajar men lagi
hisar-e-zat nahin tha tilism-e-ishq tha vo
khabar hui to magar der is khabar men lagi
dahakte rang the jo asman chhute the
khile the phuul ki ik aag si shajar men lagi
adhure lafz the avaz ghair-vazeh thi
dua ko phir bhi nahin der kuchh asar men lagi
palat ke dekha to bas hijraten thiin daman men
agarche umr yahan ik guzar-basar men lagi
parind laut kar aae the kin zaminon se
kahan ki dhuul thi jo un ke bal-o-par men lagi
Leave a Reply