ahmad-faraz

Jab Har Ek Shahr Balaon Ka Thikana Ban Jae

jab har ik shahr balaon ka thikana ban jaae

kya khabar kaun kahan kis ka nishana ban jaae

ishq khud apne raqibon ko baham karta hai

ham jise pyaar karen jan-e-zamana ban jaae

itni shiddat se na mil tu ki judai chahen

yahi qurbat tiri duuri ka bahana ban jaae

jo ghazal aaj tire hijr men likkhi hai vo kal

kya khabar ahl-e-mohabbat ka tarana ban jaae

karta rahta huun faraham main zar-e-zakhm ki yuun

shayad ainda zamanon ka khazana ban jaae

is se badh kar koi inam-e-hunar kya hai ‘faraz’

apne hi ahd men ik shakhs fasana ban jaae

More Poems

Leave a Comment