ye jo mujh se aur junun se yaan baḌi jang hoti hai der se
so kuchh aisi Dhab se laḌa.i hai laḌe sher jaise ki sher se
bani shakl laila-e-nau-javan mire daata kya kahun al-aman
vo tajalli ek jo hui ayaan kisi raat qais ke Dher se
abhi do mahine se huun juda na to ḳhvab men bhi nazar paḌa
bhala aur andher ziyada kya kahin hoga aise andher se
mujhe shamiyana tale se kya mira dil to kahta hai mujh se aa
sar-e-rah koThe pe baiTh ja yahin takiya de ke munDer se
tiri badle ki ye oḌhni are barq kaunde nazar men tab
kare ye ghaTa jo muqabla kisi peshvaz ke gher se
nahin intizar ke hausle mujhe sujhe saikḌon artale
qasam un ne khaa.i to hai vale mira ji Dare hai adher se
bhala mujh se dev ke samne koi Thonk sakte hain ḳham bhala
are ye anguThe se aadmi to bichare ḳhud hain baTer se
”vahi pi kahan vahi pi kahan” yahi ek raT si jo hai so hai
maharaj choT si lagti hai mujhe is papihe ki Ter se
ghazal ‘insha’ aur bhi ek likh isi bahar aur radif ki
ki zabar ki qafiye jis men hon mujhe nafrat aa ga.i zer se
Leave a Reply