dil hamara hai ki ham ma.il-e-fariyad nahin
varna kya zulm nahin kaun si bedad nahin
husn ik shan-e-ilahi hai magar ai be-mehr
bevafa.i to koi husn-e-ḳhuda-dad nahin
sar-e-turbat vo ḳhamoshi pe miri kahte hain
marne vaale tujhe paiman-e-vafa yaad nahin
husn-e-arasta qudrat ka atiyya hai magar
kya mira ishq-e-jigar-soz ḳhuda-dad nahin
laakh paband-e-ala.eq na rahe koi yahan
tab-e-varasta magar fikr se azad nahin
baham a.in-e-vafa rasm-e-mohabbat kaisi
vaqt ab vo hai ki bandon ko ḳhuda yaad nahin
chashm-e-maḳhmur vo hai kabil-e-gharq-e-mai-e-nab
daftar-e-ishq pe jab tak ki mire saad nahin
puchhte kya ho tabahi ka fasana mujh se
dil-e-barbad ki surat bhi mujhe yaad nahin
zarre zarre men hai ik alam-e-ma.ani pinhan
ḳhak-e-barbad ko samjhe ho ki abad nahin
aap kahte hain ki hai gor-e-ghariban viran
aisi basti to jahan men koi abad nahin
ansuon ko bhi zara dekh le rone vaale
in sitaron men to duniya koi abad nahin
husn-e-ḳhud main ne kiye aa.ine ke sau TukḌe
ab na kahna ki nigahen sitam-ijad nahin
kab ḳhayalat pe mumkin hai kisi ka pahra
dil to azad raha main agar azad nahin
sina-kavi ke liye shart hai dil ki himmat
naḳhun-e-dast-e-junun tesha-e-farhad nahin
be-ḳhudi manzil-e-irfan hai zara hosh men aa
hai ḳhudi ka ye natija ki ḳhuda yaad nahin
tabqa-e-ḳhak men hai alam-e-ḳhaosh-abad
jis ko barbad samajhte ho vo barbad nahin
dil-e-viran ki tabahi ki koi had hai ‘aziz’
main samajhta huun ki duniya abhi abad nahin
Leave a Reply