Sochte Hain To Kar Guzarte Hain

sochte hain to kar guzarte hain

ham to manjdhar men utarte hain

maut se khelte hain ham lekin

ghair ki bandagi se Darte hain

jaan apni to hai hamen bhi aziiz

phir bhi shoalon pe raqs karte hain

dil-figaron se puchh kar dekho

kitni sadiyon men ghaav bharte hain

jin ko hai indimal-e-zakhm aziiz

amad-e-fasl-e-gul se Darte hain

chhup ke rote hain sab ki nazron se

jo gila hai vo khud se karte hain

Leave a Comment