us ki surat ka tasavvur dil men jab laate hain ham
ḳhud-ba-ḳhud apne se hamdam aap ghabrate hain ham
hosh gar rahta ho tujh ko ham se poshida na rakh
jab vo yaan aata hai ai dil tab kahan jaate hain ham
baiThe baiThe kyuun yakayak haa.e dil khoya gaya
hamdam is ka kuchh sabab DhunDe nahin paate hain ham
ḳhud-ba-ḳhud kal shab ko vo bole uTha munh se naqab
jo na dekha ho kisi ne mujh ko, dikhlate hain ham
be-sabab ho kar ḳhafa jab kuchh sunata hai vo shoḳh
ji hi ji men apne upar haa.e jhunjhlate hain ham
shaam ko saaqi kabhi aata hai gar tera ḳhayal
sub.h tak bhi hosh men apne nahin aate hain ham
ham ne gham kya ḳhaak khaya gham ne ham ko kha liya
log ai hamdam samajhte hain ki gham khate hain ham
jaam le kar mujh se vo kahta hai apne munh ko pher
ru-ba-ru yuun tere mai piine se sharmate hain ham
jo kalam-e-ishq ye hargiz samajhta hi nahin
dil ko sau sau tarah ‘ghamgin’ haa.e samjhate hain ham
Leave a Reply