na ḳhushi se hamen na gham se gharaz
hai magar ek us sanam se gharaz
na hamen jaam se na ḳhum se gharaz
yaar rakhte hain apne dam se gharaz
nahin parva koi jiye ki mare
hai unhen rat-din sitam se gharaz
jo ki shakir hain apni qismat par
nahin kuchh un ko besh-o-kam se gharaz
ham rasul-e-ḳhuda ki ummat hain
hai hamen shafa-e-umam se gharaz
aur tasadduq se us ke rakhte hain
apne allah ke ham karam se gharaz
‘aish’ jo us nigah ke ashiq hain
un ko kya ḳhanjar-e-do-dam se gharaz
Leave a Reply