ghusse men jo nikhra hai us husn ka kya kahna
kuchh der abhi ham se tum yuun hi khafa rahna
us husn ke shoale ki tasvir bana len ham
un garm nigahon ko siine se laga len ham
pal-bhar isi aalam men ai jan-e-ada rahna
kuchh der abhi ham se tum yuun hi khafa rahna
ye dahka hua chehra ye bikhri hui zulfen
ye badhti hui dhadkan ye chadhti hui sansen
saman-e-qaza ho tum saman-e-qaza rahna
kuchh der abhi ham se tum yuun hi khafa rahna
pahle bhi hasin thiin tum lekin ye haqiqat hai
vo husn musibat tha ye husn qayamat hai
auron se to badh kar ho khud se bhi siva rahna
kuchh der abhi ham se tum yuun hi khafa rahna