Nazeer Siddiqui
kis quvvat-e-be-dard ka iz.har hai duniya
har dil ko gila hai ki dil-azar hai duniya
log is ko kaha karte hain achchha bhi bura bhi
kya ḳhuub ki donon ki saza-var hai duniya
milta hi nahin koi dil-e-zar ka pursan
mere liye ik mahfil-e-aghyar hai duniya
har sang men duniya ko nazar aata hai ik but
aur aise har ik but ki parastar hai duniya
ye hashr ye hangama nahin aaj pe mauquf
sach ye hai ki sadiyon hi se bimar hai duniya
neki koi karta ho to karvaT nahin leti
niyyat ho gunahon ki to bedar hai duniya
kis tarah karen us ki mohabbat pe bharosa
ai dost qayamat ki adakar hai duniya
is tarah bhi duniya ka gila karte hain goya
ma.asum hai insan gunahgar hai duniya
duniya men bura vaqt to aata hai sabhi par
ab ḳhud hi bure vaqt se do-char hai duniya
rah rah ke barasti hain adavat ki ghaTa.en
lagta hai ki girti hui divar hai duniya
kya kahiye use kuchh bhi samajh men nahin aata
ik vadi-e-pur-ḳhar ki gulzar hai duniya
jannat bhi usi men hai jahannam bhi usi men
gahvara-e-har-ishrat-o-azar hai duniya
Duube hue taron ka ye matam nahin karti
chaḌhte hue suraj ki parastar hai duniya
Leave a Reply