Kab Talak Chalna Hai Yun Hi Ham-Safar Se Baat Kar

Bharat Bhushan Pant

kab talak chalna hai yuun hi ham-safar se baat kar

manzilen kab tak milengi rahguzar se baat kar

tujh ko mil ja.ega tere sab savalon ka javab

kashtiyan kyuun Duub jaati hain bhanvar se baat kar

kab talak chhupta rahega yuun hi apne-ap se

aa.ine ke ru-ba-ru aa apne Dar se baat kar

baḌh chuki hain ab tiri fikr-o-nazar ki vus.aten

jugnuon ko chhoḌ ab shams o qamar se baat kar

is tarah to aur bhi teri ghuTan baḌh ja.egi

ham-nava koi nahin to bam-o-dar se baat kar

dard kya hai ye samajhna hai to apne dil se puchh

ansuon ki baat hai to chashm-e-tar se baat kar

har safar manzar se pas-e-manzar talak to kar liya

dekhna kya chahti hai ab nazar se baat kar

dhuup kaise saa.e men tabdil hoti hai yahan

is hunar ko sikhna hai to shajar se baat kar

zaḳhm poshida raha to dard baḌhta ja.ega

be-takalluf ho ke apne chara-gar se baat kar