Aankh Jo Nam Ho Wahi Dida-E-Tar Mera Hai

aankh jo nam ho vahi dida-e-tar mera hai

mauj-e-gham uTThe kahin us ka guhar mera hai

dekh luun main to sitare hain na dekhun to dhuan

kya rasa itna kaf-e-dast-e-nazar mera hai

samar o gul hain gulistan-faroshon ke liye

abyari ke liye ḳhun-e-jigar mera hai

qasr ho ya ki lahad donon kiyraye ke makan

roz kahta hai koi aa ke ye ghar mera hai

dasht ki uḌti hui ret pe likh dete hain log

ye zamin meri ye divar ye dar mera hai

is shar-abad ḳharabe men kahan husn-o-jamal

husn jitna bhi hai sab husn-e-nazar mera hai

maut hai jur.at-e-iz.har ki pazmurda-labi

saz-e-taḳhliq lab-e-arz-e-hunar mera hai

vo ḳhuda ho to ho main DhunDne kyuun ja.un use

ḳhud hi apna le mujhe baḌh ke vo gar mera hai

kaT ke sar paḌhte hain nezon pe bhi qur.an ‘vahid’

juzv-e-tan rah ke bhi chup kis liye sar mera hai