Seema Naqvi
be-ḳhabar kuchh na jiite ji samjhe
jaan se guzri to zindagi samjhe
ab bahut der ho chuki chhoḌo
marte marte bhi kya koi samjhe
ik zara a.ina dikhaya tha
aap jis ko khari khari samjhe
dhun ke pakke hain kar hi ja.enge
jo bhi is dil ne Thaan li samjhen
ham the ḳhauf-e-fasad-e-ḳhalq se chup
log ehsas-e-bartari samjhe
o mera haal puchhne vaale
baat ab vo nahin rahi samjhe
jo samajhne ka dam bhare ‘sima’
kya hi achchha ho vaqa.i samjhe
Leave a Reply