surat-e-ishq badalta nahin tu bhi main bhi
gham ki hiddat se pighalta nahin tu bhi main bhi
ab zamane men mohabbat hai tamashe ki tarah
is tamashe se bahalta nahin tu bhi main bhi
in sulagti hui sanson ko nahin dekhte log
aur samajhte hain ki jalta nahin tu bhi main bhi
apna nuqsan barabar ka hua andhi men
ab kisi shaḳh pe phalta nahin tu bhi main bhi
ai samundar tiri phaili hui banhon ki qasam
apni maujon se nikalta nahin tu bhi main bhi
Dagmagate hain qadam Dolti hai vaqt ki saans
tar-e-hasti pe sambhalta nahin tu bhi main bhi
ab vo ghalib hai na vo ahl-e-karam hain ‘tauqir’
ishq men bhes badalta nahin tu bhi main bhi
Leave a Reply