Mere Etimad Ko Gham Mila Meri Jab Kisi Pe Nazar Gai

mire e’timad ko gham mila miri jab kisi pe nazar ga.i

isi justuju isi karb men miri saari umr guzar ga.i

kabhi ban ke ishq ki raz-dan kabhi ho ke aah ki dastan

ka.i tarah tere huzur tak mire hal-e-dil ki ḳhabar ga.i

mujhe mere haal pe chhoḌ do mire dosto ye karam karo

miri umr-e-rafta ko do sada mujhe dard de ke kidhar ga.i

kabhi mai-kashon se ḳhulus tha tiri chashm-e-shisha-navaz ko

magar ab ye duur hai saqiya ki nazar se qadr-e-bashar ga.i

mujhe zabt-e-gham ka na de sabaq zara apne haal pe kar nazar

miri uljhanon ke ḳhayal se tiri zulf bhi to bikhar ga.i

ye to vaqt vaqt ki baat hai koi ro diya koi hans diya

miri vardat-e-dil-o-nazar miri zindagi pe guzar ga.i

kise DhunDte ho nagar nagar kise shahr shahr ho puchhte

tumhen shams’ jis ki talash hai vo nigah-e-a.ina gir ga.i