ahmad-adil

Mai-Kada Sa Bana Diya Ghar Mein

mai-kada saa banaa diyaa ghar me.n

aur saaqii bithaa diyaa ghar me.n

us kii zid thii ki ehtimaam karuu.n

mai.n ne KHud ko bichhaa diyaa ghar me.n

tere pahre jagah jagah paa kar

KHud ko qaidii banaa diyaa ghar me.n

terii qurbat thii aag thii kyaa thii

meraa sab kuchh jalaa diyaa ghar me.n

Dar ke apne hii saae se mai.n ne

har diye ko bujhaa diyaa ghar me.n

KHud se ruu-posh hii bhalaa thaa mai.n

aaina kyuu.n lagaa diyaa ghar me.n

noch kar apne baal-o-par ‘aadil’

mai.n ne pi.njra banaa diyaa ghar me.n

More Poems

Leave a Comment