chashm-e-yaqin se dekhiye jalva-gah-e-sifat men
husn hi husn hai tamam ishq ki ka.enat men
aise bhi vaqt aa.e hain ishq ki vardat men
mastiyan jhuum jhuum uThin dida-e-ka.inat men
tu miri sarguzisht-e-gham sun ke karega kya nadim
vaqf-e-ḳhalish hai har-nafas dard hai baat baat men
jam-o-sharab-o-ḳhum subu saqiya hain bara.e-nam
nashsha tiri nazar ka hai mai-kada-e-hayat men
jis ka aniis tera gham jis ki rafiq teri yaad
us ko mila sukun-e-dil bazm-e-taghayyurat men
tark-o-talab ke marhale is tarah ham ne tai kiye
samne mere vo rahe a.ina-e-hayat men
alam-e-be-ḳhudi men gar sajda kiya koi ‘vaqar’
ban gaya naqsh-e-javedan manzil-e-be-sabat men
Leave a Reply