abu-bakr-abbad

Agar Khuda Mil Gaya Mujhko

ye sochta huun jo

khuda kabhi didar bakhshega

aur apne fazl se dega ijazat mangne ki kuchh

to na dastar-o-qaba na jibh-o-khirqa

na daulat na mahal na sar pe taaj mangunga

na ohda-o-mansab na koi jah-o-jalal

na ilm-o-agahi na masnad na eqtidar mangunga

faravani gham se najat na farigh-ul-bali

na sehat na shifa na achchhi maut mangunga

na takmil-e-arzu ki dua na nafs-e-mutmainna ki

na umr-e-khizr na shohrat na khvab ki taabir mangunga

na dushmanon ke zarar se na shar se doston ke

na kibr-sini na zoaf na lachari se panah mangunga

na duniya jahan ki khushiyan na shan-o-shaukat hi

na khush-nasibi na dil ka chain na sukun-e-ruh mangunga

na khush-gavar raten na tul-e-shabab na niind na aghosh-e-mahbub

na saman-e-aish-o-tarab na hur-o-qusur mangunga

na rusvai se bachne ki na izzat aabru ki khvahish hai

na shohrat-o-maqbuliyat na achchhi image mangunga

na qarz ke bojh na khauf na dahshat se

na kisi ke jabr se na zulm se hifazat ki dua mangunga

ab aap sochte honge

ki ye bavla ye divana ye pagal shakhs

na jaane akhir khuda se kya mangega

so mire hamdam mire dosto mire yaaro

zara qarib aao aao bataun raaz tumhen dukhi dil ka

main khuda-e-qadir-e-mutlaq rahim-o-akram se

junun-e-mazhabi ke khatme aur amn ki faza mangunga

More Poems

Leave a Comment