adavaten nasib ho ke rah ga.iin
mohabbaten raqib ho ke rah ga.iin
parind hain na anganon men peḌ hain
ye bastiyan ajiib ho ke rah ga.iin
taras rahi hain yuun bahar ko ruten
gharib ka nasib ho ke rah ga.iin
bas ek pal dhanak ki saari shoḳhiyan
mire bahut qarib ho ke rah ga.iin
mire dukhon ka zikr shahr shahr hai
udasiyan naqib ho ke rah ga.iin
main ḳhud se jab bichhaḌ ga.i to bas tiri
dua.en hi habib ho ke rah ga.iin
rivayaton ki qatl-gah-e-ishq men
ye laḌkiyan salib ho ke rah ga.iin
Leave a Reply