atish-e-fikr badan ghulta ho paiham jaise
kisi nagin ne kahin chaTi ho shabnam jaise
bas isi moḌ se kuchh aage hai manzil apni
hadse maut nishan-e-rah-e-pur-ḳham jaise
barf-aluda gulon par ye chamakti kirnen
un ki hansti hui ankhen huiin pur-nam jaise
mausam-e-gul men ye patton ke khaḌakne ki sada
nafas-e-umr ki avaz ho maddham jaise
zaḳhm-e-dil roz kuredo to ho lazzat afzun
ik mudava hai gham-e-yar ho marham jaise
os men Duube shagufon ki udasi ka dhuan
kisi bimar ki ankhen huiin pur-nam jaise
ankhon ankhon men koi baat hui phulon men
apne gulshan ki faza ho ga.i barham jaise
husn hi husn hai kashmir ke but-ḳhane men
dudhiya chandni phaili hui punam jaise
ḳhuub ‘ja.afar’-raza ahbab tumhare hain ye
jo havaon se badal jaate hain mausam jaise
Leave a Reply