lahu ko surḳh gulabon men band rahne do
shikasta ḳhvab ke shishon pe us ka aks pade
siyah mitti ke niche safed baal jale
kisi ke daant miri ungliyan chaba jaaen
ḳhala ke ziine se parchhaiyan utarne lagen
har ek lamhe ke chehre pe dhuup marne lage
udaas vaqt ke kandhe pe haath rakh ke chalun
buzurg baap ke chehre ki jhurriyan chumun
ḳhamosh hain dar-o-divar khidkiyan chup hain
gali ke mod pe ruk jaae raat ka saaya
mujhe na roko mujhe meri maan se milne do
ye mere bhaai ye bahnen ye hamila biivi
lahu ko surḳh gulabon men band rahne do