ḳhvab ne rakh liya fasane men
tum ne taḳhir ki jagane men
is zamin ko falak banane men
main bhi shamil tha ik zamane men
tere kirdar ko uThane men
mujh ko marna paḌa fasane men
kaam karte hain roz-o-shab sahab
ham mohabbat ke kar-ḳhane men
bam-o-dar dushmanon ke sathi the
mujh ko divar se lagane men
ishq men thoḌi si suhulat thi
hazrat-e-qais ke zamane men
din-o-duniya se jaana paḌta hai
dil ko divangi banane men
vaqt hi har taraf rukavaT hai
la-makan se makan banane men
aag ke darmiyan baiThe hain
qissa-ḳhvani ke cha.e-ḳhane men
maktab-e-ishq men sabaq paḌhne
log a.enge har zamane men
Leave a Reply