Tahzeeb Hafi
ajiib ḳhvab tha us ke badan men kaa.i thi
vo ik pari jo mujhe sabz karne aa.i thi
vo ik charag-kada jis men kuchh nahin tha mira
jo jal rahi thi vo qindil bhi para.i thi
na jaane kitne parindon ne is men shirkat ki
kal ek peḌ ki taqrib-e-ru-numa.i thi
havav aao mire gaanv ki taraf dekho
jahan ye ret hai pahle yahan tara.i thi
kisi sipah ne ḳheme laga diye hain vahan
jahan pe main ne nishani tiri daba.i thi
gale mila tha kabhi dukh bhare december se
mire vajud ke andar bhi dhund chha.i thi
Leave a Reply