ek rahne se yahāñ vo māvarā kaise huā
sab se pahlā aadmī ḳhud se judā kaise huā
tere baare meñ agar ḳhāmosh huuñ maiñ aaj tak
phir tire haq meñ kisī kā faisla kaise huā
ibtidā meñ kaise sahrā kī sadā samjhī ga.ī
āḳhirash saarā zamāna ham-navā kaise huā
chand hī the log jin ke sāmne kī baat thī
maiñ ne un logoñ se ḳhud jā kar sunā kaise huā
jab ki sābit ho chukā nuqsān hone kā ‘malāl’
fā.eda kyā sochne se kyuuñ huā kaise huā