Nazar Nazar Mein Ada-E-Jamal Rakhte The

Ghulam Mohammad Qasir

nazar nazar men ada-e-jamal rakhte the

ham ek shaḳhs ka kitna ḳhayal rakhte the

jabin pe aane na dete the ik shikan bhi kabhi

agarche dil men hazaron malal rakhte the

ḳhushi usi ki hamesha nazar men rahti thi

aur apni quvvat-e-gham bhi bahal rakhte the

bas ishtiyaq-e-takallum men bar-ha ham log

javab dil men zaban par saval rakhte the

usi se karte the ham roz o shab ka andaza

zamin pe rah ke vo suraj ki chaal rakhte the

junun ka jaam mohabbat ki mai ḳhirad ka ḳhumar

hamin the vo jo ye saare kamal rakhte the

chhupa ke apni sisakti sulagti sochon se

mohabbaton ke uruuj o zaval rakhte the

kuchh un ka husn bhi tha mavara misalon se

kuchh apna ishq bhi ham be-misal rakhte the

ḳhata nahin jo khile phuul rah-e-sarsar men

ye jurm hai ki vo fikr-e-ma.al rakhte the