meri nazar nazar men hain manzar jale hue
ubhrenge harf harf se paikar jale hue
sho.alon ka raqs ab-e-ravan tak pahunch gaya
dariya pe bah ke aa.e hain chhappar jale hue
har zarra is zamin ka lau de raha hai aaj
kal aap ko milenge samundar jale hue
mazlum-o-be-qusur jinhen kah rahe hain aap
nikle hain un ke ghar se bhi ḳhanjar jale hue
ankhon ki is jalan se na mil pa.egi najat
dekhe hain meri ankhon ne manzar jale hue
Darne lage hain aag se atish-parast bhi
dekhe hain jab se charon taraf sar jale hue
be-ḳhvab vahshaton ko sulane ke vaste
arasta hain aaj bhi bistar jale hue
Leave a Reply