Dil Pareshan Hai Kya Kiya Jae

dil pareshan hai kya kiya jaae

aql hairan hai kya kiya jaae

shauq-e-mushkil-pasand un ka husul

sakht asan hai kya kiya jaae

ishq-e-khuban ke saath hi ham men

naz-e-khuban hai kya kiya jaae

be-sabab hi miri tabiat-e-gham

sab se nalan hai kya kiya jaae

bavajud un ki dil-navazi ke

dil gurezan hai kya kiya jaae

main to naqd-e-hayat laaya tha

jins-e-arzan hai kya kiya jaae

ham samajhte the ishq ko dushvar

ye bhi asan hai kya kiya jaae

vo baharon ki naz-parvarda

ham pe nazan hai kya kiya jaae

misr-e-lutf-o-karam men bhi ai ‘jaun’

yad-e-kanan hai kya kiya jaae

Leave a Comment