kabhi yahan liye hue kabhi vahan liye hue
phiri hai justuju tiri kahan kahan liye hue
zamin-e-dil ki khaak hai sad-asman liye hue
tanazzulat-e-ishq men taraqqiyan liye hue
dil-o-jigar liye hue mata-e-jan liye hue
kisi ka navak-e-nazar talashiyan liye hue
usi gali se aai hai shamim-e-zulf laai hai
nasim-e-sub.h aai hai tasalliyan liye hue
mire gham-e-nihan men hai naved-e-ishrat-afrin
bahar hi bahar hai miri khizan liye hue
hamari aah ke sharar hamin ko phunkne lage
hava ke jhonke aae saath bijliyan liye hue
tiri gali men mah-ru pade hue hain char-su
tamam zarre khaak ke tajalliyan liye hue
na qurb-e-gul ki taab thi na hijr-e-gul men chain tha
chaman chaman phire ham apna ashiyan liye hue
nigah-e-ahl-e-raz men haqiqat-o-majaz men
hamari be-nishaniyan tira nishan liye hue
uthe hain hashr men fida-e-ku-e-yar is tarah
jabin men sajde dil men yad-e-astan liye hue
na dil milega ‘bedam’ aur na dil ki hasraten kahin
ki gum hua hai yusuf apna karvan liye hue