Mahfil Mein Raat Raat Ujala Usi Ka Hai

mahfil meñ raat raat ujālā usī kā hai

sāġhar kī gardishoñ meñ havāla usī kā hai

us rañg-chor ne to dhanak ko churā liyā

aayā hai chāñdnī meñ to haala usī kā hai

ham to akele roz ulajhte haiñ ḳhvāb se

kuchh bojh zindagī kā sambhālā usī kā hai

dar dar bhaTakte rahne kī aadat nahīñ magar

mahfil se ye ġharīb nikālā usī kā hai

‘ārif’ ‘shamīm’ saath chaleñ raat ho ga.ī

raste meñ chāñd taarā uchhālā usī kā hai

Leave a Comment