miri chashm-e-shauq men barha vo hazaron rang badal ga.e
main fareb-e-husn na kha saka vo kalim the jo bahal ga.e
shab-e-gham ghalat ye ḳhayal tha ki falak pe taare nikal ga.e
mujhe na-murad sa dekh kar vo charagh ghi ke the jal ga.e
tu agar hai talib-e-dil-ruba to farotani ka maza uTha
ye maqam-e-ishq hai dekhna jo yahan gire vo sanbhal ga.e
hain junun-mizaj bala ke ham tu hamara josh-e-junun na puchh
kabhi chal ke arsh pe dam liya kabhi us se duur nikal ga.e
unhen dekhne ga.e jis ghaḌi kaha shart hai yahan be-ḳhudi
hui un ki diid to yuun hui ye ajiib chaal vo chal ga.e
main ma.al-e-husn-o-vafa pe kuchh nazar apni Dalne jab laga
na patang hi the na sham.a thi vo pighal ga.i to vo jal ga.e
sar-e-bazm sun ke miri ghazal lage kahne jauhariyan-e-fan
ke musha.ere men to ‘za.iq’ aaj suḳhan ke la.al ugal ga.e
Leave a Reply