shayad miri nigah men koi shigaf tha
varna udaas raat ka chehra to saaf tha
ik laash tairti rahi barfili jhiil men
jhuTi tasalliyon ka amiin zer-e-naf tha
boson ki raakh men the sulagte sharar-e-lams
chehre ki silvaTon men koi inkishaf tha
dozaḳh ke gird gunge farishte the mahv-e-raqs
aur pisliyon ki Tiis pe maila ghilaf tha
khiḌki se jhankta hua vo pur-ghurur sar
taaza hava se us ka koi iḳhtilaf tha
raste farar ke sabhi masdud to na the
apni shikast ka mujhe kyuun e’tiraf tha
Leave a Reply