shikast de ke mujhe daar par sajata hai
vo apni jiit miri haar par sajata hai
mizaj-e-yar tiri barhami ke dil sadqe
ajiib rang ruḳh-e-yar par sajata hai
ik aise lamha-e-tanha.i se main vaqif huun
vo jab mujhe lab-o-ruḳhsar par sajata hai
tire divane ko tasvir mil ga.i hai tiri
badal badal ke jo divar par sajata hai
use pasand nahin motiye ke phuul magar
kala.i men mire israr par sajata hai
vo jis ke aib hunar se badal diye main ne
vo tohmaten mire kirdar par sajata hai
‘salim’ ‘fauz’ safa.i men kuchh nahin kahna
gale men tauq vo iz.har par sajata hai
Leave a Reply