Seema Naqvi
abr hi abr hai barasta na.iin
ab ke savan tumhare jaisa na.iin
ḳhvab aur saint kar rakhen ankhen
in se aansu to ik sambhalta na.iin
ghumti hai zamin gird mire
paanv uThte hain raqs hota na.iin
noch Daale hain apne par main ne
main bhi insan huun farishta na.iin
kaisa harja.i ho gaya aansu
mera daman hai aur giila na.iin
kab hue dost kab hue dushman
aap ka bhi koi bharosa na.iin
dil ki baten aur is se chhoḌo bhi
vo jo lagta hai yaar vaisa na.iin
baton baton men jaan lenge sabhi
jo bhi tera nahin vo mera na.iin
asmanon men kho ga.iin ja kar
kuchh patangon ki koi ‘sima’ na.iin
Leave a Reply