ḳhalvati-e-ḳhayal ko hosh men koi laa.e kyuun
shola-e-tur hi sahi ham se nazar mila.e kyuun
ham se kuchh aur hi kaha un se kuchh aur kah diya
bad-e-saba ye kya kiya tu ne ye gul khila.e kyuun
qais ka hasil-e-junun naaqa o mahmil o hijab
laila-e-najd-ashna ḳhalvat-e-dil men aa.e kyuun
aql haris-e-ḳhar-o-ḳhas surat-e-shola-e-havas
daulat-e-soz-e-javedan aql ke haath aa.e kyuun
gardish-e-mehr-o-mah bhi gardish-e-jam ban ga.i
sub.h na laḌkhaḌa.e kyuun shaam na jhuum jaa.e kyuun
talib-e-hujla-e-bahar dasht-e-talab hai ḳharzar
vaqt kisi ki raah men masnad-e-gul bichha.e kyuun
hashr men husn se ‘ravish’ shikva-e-ru-ba-ru ghalat
roz-e-azal ki baat hai aaj hi yaad aa.e kyuun
Leave a Reply