Shafiq Saleemi
sar men ek sauda tha bam-o-dar banane ka
aaj tak nahin socha ham ne ghar banane ka
yuun na rengti rahtin kaghazon pe tasviren
vaqt jo mila hota bal-o-par banane ka
yuun kahan bhaTakte ham ḳhvahishon ke sahra men
fan agar hamen aata mal-o-zar banane ka
chal diye akele hi justuju-e-manzil men
kaam ḳhasa mushkil tha ham-safar banane ka
ye hunar bhi aḳhir ko us ne siikh kar chhoḌa
ham se hosh-mandon ko be-ḳhabar banane ka
ek shauq aisa bhi ham ne paal rakkha hai
be-viqar logon ko mo’atabar banane ka
Leave a Reply