yad-e-ayyame koi vaj.h-e-pareshani to thi
aankh yuun ḳhali nahin thi is men hairani to thi
lab pe mohr-e-ḳhamushi pahle bhi lagti thi magar
aah ki ruḳhsat to thi ashkon ki arzani to thi
thi nazar ke samne kuchh to talafi ki umiid
khet sukha tha magar dariya men tughyani to thi
bazm se uTThe to kya ḳhalvat men ja baiThe to kya
tark-e-duniya par bhi duniya jani-pahchani to thi
dard ik jauhar hai paikar se gharaz rakhta nahin
aankh men aansu na the lab par ghazal-ḳhvani to thi
Leave a Reply