kyon kahun main ki sitam ka main saza-var na tha
dil diya tha tujhe kis tarah gunahgar na tha
umr bhar mujh se thi har ek ko be-vaj.h ḳhalish
kyunki main gulshan-e-alam men koi ḳhaar na tha
kya na kuchh ho gaya ik ghairat-e-yusuf ke liye
kab mohabbat men main rusva sar-e-bazar na tha
kya ye karta mire zaḳhm-e-jigar-o-dil ka ilaaj
charḳh-e-be-rahm koi marham-e-zangar na tha
fard nikla fan-e-duzdi men ḳhayal-e-dilbar
us ka aana tha ki pahlu men dil-e-zar na tha
kya bahalta gul-o-sumbul se chaman men mira dil
vo tiri zulf na tha ye tira ruḳhsar na tha
apni qismat hi ka shaki main mohabbat men raha
shikva-e-charḳh na tha kuchh gila-e-yar na tha
hashr ke roz mire husn-e-gunah ka yarab
teri rahmat ke siva koi ḳharidar na tha
teri ankhon ki mohabbat ka faqat tha use rog
varna kuchh nargis-e-bimar ko azar na tha
tum ne mahfil men jagah di use hasrat hai mujhe
ghair is av-bhagat ka to saza-var na tha
nargis us aankh ki bimar-e-gul us ruḳh pe nisar
bagh-e-alam men kise ishq ka azar na tha
ho ga.i rasm-e-mulaqat chalo bahs hai kya
tum ḳhata par na the aur main bhi vafadar na tha
do pyalon men hai saaqi ke ajab kaif ‘fahim’
ankhen milte hi vo tha kaun jo sarshar na tha
Leave a Reply