svang bharta huun tire shahr men sauda.i ka
ki yahi haal hai andar se tamasha.i ka
bazm ke haal pe ab ham nahin kuḌhne vaale
intizamat men kya daḳhl tamasha.i ka
ham to sau jhuuT bhi bolen vo agar haath aa.e
koi Theka to uThaya nahin sachcha.i ka
dil-e-ḳhun-gashta ko ja ja ke dikha.en yaaro
shahr men kaam nahin lala-e-sahra.i ka
log kahte hain havas ko bhi mohabbat jaise
naam paḌ jaa.e mujahid kisi balva.i ka
ye nahin hai ki navaze na ga.e hon ham log
ham ko sarkar se tamgha mila rusva.i ka
un ko TuuTa hua dil ham bhi dikha.enge ‘salim’
koi puchh aa.e vo kya lete hain banva.i ka
Leave a Reply