mire arman mayusi ke paale paḌte jaate hain
tumhari chaah men jiine ke laale paḌte jaate hain
udhar us ki shararat jis ne gham ki aag sulga di
idhar mera kaleja jis men chhale paḌte jaate hain
mire un ke ta.alluq par koi ab kuchh nahin kahta
ḳhuda ka shukr sab ke munh men taale paḌte jaate hain
gham-e-nakami-e-koshish se halat bigḌi jaati hai
kaleje men yahan be-ag chhale paḌte jaate hain
hamara dard ah-e-dil maza deta hai uḌ uḌ kar
tumhare chand se chehre pe haale paḌte jaate hain
masiha ja raha hai dauḌ kar avaz do ‘muztar’
ki dil ko dekhta ja jis men chhale paḌte jaate hain
Leave a Reply