us se phir kya gila kare koi
jo kahe sun ke kya kare koi
ham bhi kya kya kahen khuda jaane
gar hamari suna kare koi
haae vo baten pyaar ki shab-e-vasl
bhule kya yaad kya kare koi
log kyuun puchhte hain haal mira
zikr kis baat ka kare koi
dard-e-dil ka ilaaj ho kis se
yuun masiha hua kare koi
bevafa gar kahun to kahte hain
kya har ik se vafa kare koi
jaae gar jaan to sau hain tadbiren
jaae gar dil to kya kare koi
koi apni khata to ho maalum
uzr kis baat ka kare koi
dil ka kuchh haal hi nahin khulta
gar maraz ho dava kare koi
kabhi main ne bhi kuchh kaha tum se
na suno, kuchh kaha kare koi
tum se be-rahm par na dil aae
aur aae to kya kare koi
saikdon baten kah ke kahte hain
phir hamen kyuun khafa kare koi
koi kab tak na de javab tumhen
chupka kab tak suna kare koi
shikva us but ka har kisi se ‘nizam’
us se kah de khuda kare koi