Anwar Sadeed
tujh ko to quvvat-e-iz.har zamane se mili
mujh ko azada-ravi ḳhuun jalane se mili
qarya-e-jan ki tarah un pe udasi thi muhit
dar-o-divar ko raunaq tire aane se mili
yuun tasalli ko to ik yaad bhi kaafi thi magar
dil ko taskin tire lauT ke aane se mili
main ḳhizan-dida shajar ki tarah gumnam sa tha
mujh ko vaq.at tiri tasvir banane se mili
shaḳh-e-ehsas pe jo phuul khile hain un ko
zindagi husn ka idrak baḌhane se mili
jagti aankh se jo ḳhvab tha dekha ‘anvar’
us ki ta.abir mujhe dil ke jalane se mili
Leave a Reply