O Des Se Aane Wale Bata

o des se aane vaala hai bata

o des se aane vaale bata

kis haal men hain yaran-e-vatan

avara-e-ghurbat ko bhi suna

kis rang men hai kanan-e-vatan

vo bagh-e-vatan firdaus-e-vatan

vo sarv-e-vatan raihan-e-vatan

o des se aane vaale bata

o des se aane vaale bata

kya ab bhi vahan ke baghon men

mastana havaen aati hain

kya ab bhi vahan ke parbat par

ghanghor ghataen chhati hain

kya ab bhi vahan ki barkhaen

vaise hi dilon ko bhati hain

o des se aane vaale bata

o des se aane vaale bata

kya ab bhi vatan men vaise hi

sarmast nazare hote hain

kya ab bhi suhani raton ko

vo chand sitare hote hain

ham khel jo khela karte the

kya ab vahi saare hote hain

o des se aane vaale bata

o des se aane vaale bata

kya ab bhi shafaq ke sayon men

din raat ke daman milte hain

kya ab bhi chaman men vaise hi

khush-rang shagufe khilte hain

barsati hava ki lahron se

bhige hue paude hilte hain

o des se aane vaale bata

o des se aane vaale bata

shadab-o-shagufta phulon se

maamur hain gulzar ab ki nahin

bazar men malan laati hai

phulon ke gundhe haar ab ki nahin

aur shauq se tuute padte hain

nau-umr kharidar ab ki nahin

o des se aane vaale bata

o des se aane vaale bata

kya shaam pade galiyon men vahi

dilchasp andhera hota hai

aur sadkon ki dhundli shamon par

sayon ka basera hota hai

baghon ki ghaneri shakhon men

jis tarah savera hota hai

o des se aane vaale bata

o des se aane vaale bata

kya ab bhi vahan vaisi hi javan

aur madh-bhari raten hoti hain

kya raat bhar ab bhi giton ki

aur pyaar ki baten hoti hain

vo husn ke jaadu chalte hain

vo ishq ki ghaten hoti hain

o des se aane vaale bata

o des se aane vaale bata

miraniyon ke aghosh men hai

abad vo bazar ab ki nahin

talvaren baghal men daabe hue

phirte hain trahdar ab ki nahin

aur bahliyon men se jhankte hain

turkan-e-siyah-kar ab ki nahin

o des se aane vaale bata

o des se aane vaale bata

kya ab bhi mahakte mandir se

naqus ki avaz aati hai

kya ab bhi muqaddas masjid par

mastana azaan tharrati hai

aur shaam ke rangin sayon par

azmat ki jhalak chha jaati hai

o des se aane vaale bata

o des se aane vaala bata

kya ab bhi vahan ke panghat par

panhariyan paani bharti hain

angdai ka naqsha ban ban kar

sab mathe pe gagar dharti hain

aur apne gharon ko jaate hue

hansti hui चुहलें karti hain

o des se aane vaale bata

o des se aane vaale bata

barsat ke mausam ab bhi vahan

vaise hi suhane hote hain

kya ab bhi vahan ke baghon men

jhule aur gaane hote hain

aur duur kahin kuchh dekhte hi

nau-umr divane hote hain

o des se aane vaale bata

o des se aane vaale bata

kya ab bhi pahadi chotiyon par

barsat ke badal chhate hain

kya ab bhi hava-e-sahil ke

vo ras bhare jhonke aate hain

aur sab se unchi tikri par

log ab bhi tarane gaate hain

o des se aane vaale bata

o des se aane vaale bata

kya ab bhi pahadi ghatiyon men

ghanghor ghataen gunjti hain

sahil ke ghanere pedon men

barkha ki havaen gunjti hain

jhengur ke tarane jagte hain

moron ki sadaen gunjti hain

o des se aane vaale bata

o des se aane vaale bata

kya ab bhi vahan melon men vahi

barsat ka jauban hota hai

phaile hue bad ki shakhon men

jhulon ka nasheman hota hai

umde hue badal hote hain

chhaya hua savan hota hai

o des se aane vaale bata

o des se aane vaale bata

kya shahr ke gird ab bhi hai ravan

dariya-e-hasin lahrae hue

juun god men apne man ko liye

nagin ho koi tharrae hue

ya nuur ki hansuli huur ki gardan

men ho ayaan bil khaae hue

o des se aane vaale bata

o des se aane vaale bata

kya ab bhi faza ke daman men

barkha ke samay lahrate hain

kya ab bhi kanar-e-dariya par

tufan ke jhonke aate hain

kya ab bhi andheri raton men

mallah tarane gaate hain

o des se aane vaale bata

o des se aane vaale bata

kya ab bhi vahan barsat ke din

baghon men baharen aati hain

maasum o hasin doshizaen

barkha ke tarane gaati hain

aur titriyon ki tarah se rangin

jhulon par lahrati hain

o des se aane vaale bata

o des se aane vaale bata

kya ab bhi ufuq ke siine par

shadab ghataen jhumti hain

dariya ke kinare baghon men

mastana havaen jhumti hain

aur un ke nashile jhonkon se

khamosh fazaen jhumti hain

o des se aane vaale bata

o des se aane vaale bata

kya shaam ko ab bhi jaate hain

ahbab kanar-e-dariya par

vo ped ghanere ab bhi hain

shadab kanar-e-dariya par

aur pyaar se aa kar jhankta hai

mahtab kanar-e-dariya par

o des se aane vaale bata

o des se aane vaale bata

kya aam ke unche pedon par

ab bhi vo papihe bolte hain

shakhon ke hariri pardon men

naghmon ke khazane gholte hain

savan ke rasile giton se

talab men amras gholte hain

o des se aane vaale bata

o des se aane vaale bata

kya pahli si hai maasum abhi

vo madrase ki shadab faza

kuchh bhule hue din guzre hain

jis men vo misal-e-khvab faza

vo khel vo ham-sin vo maidan

vo khvab-gah-e-mahtab faza

o des se aane vaale bata

o des se aane vaale bata

kya ab bhi kisi ke siine men

baaqi hai hamari chaah bata

kya yaad hamen bhi karta hai

ab yaron men koi aah bata

o des se aane vaale bata

lillah bata lillah bata

o des se aane vaale bata

o des se aane vaale bata

kya ham ko vatan ke baghon ki

mastana fazaen bhuul gaiin

barkha ki baharen bhuul gaiin

savan ki ghataen bhuul gaiin

dariya ke kinare bhuul gae

jangal ki havaen bhuul gaiin

o des se aane vaale bata

o des se aane vaale bata

kya gaanv men ab bhi vaisi hi

masti-bhari raten aati hain

dehat ki kamsin mah-vashen

talab ki janib jaati hain

aur chand ki saada raushni men

rangin tarane gaati hain

o des se aane vaale bata

o des se aane vaale bata

kya ab bhi gajar-dam charvahe

revad ko churane jaate hain

aur shaam ke dhundle sayon ke

hamrah gharon ko aate hain

aur apni rasili bansuriyon

men ishq ke naghme gaate hain

o des se aane vaale bata

o des se aane vaale bata

kya gaanv pe ab bhi savan men

barkha ki baharen chhati hain

maasum gharon se bhor-bhaie

chakki ki sadaen aati hain

aur yaad men apne maike ki

bichhdi hui sakhiyan gaati hain

o des se aane vaale bata

o des se aane vaale bata

dariya ka vo khvab-aluda sa ghaat

aur us ki fazaen kaisi hain

vo gaanv vo manzar vo talab

aur us ki havaen kaisi hain

vo khet vo jangal vo chidiyan

aur un ki sadaen kaisi hain

o des se aane vaale bata

o des se aane vaale bata

kya ab bhi purane khanDaron par

tarikh ki ibrat taari hai

annpurna ke ujde mandir par

mayusi-o-hasrat taari hai

sunsan gharon par chhavni ke

virani o riqqat taari hai

o des se aane vaale bata

o des se aane vaale bata

akhir men ye hasrat hai ki bata

vo gharat-e-iman kaisi hai

bachpan men jo aafat Dhati thi

vo afat-e-dauran kaisi hai

ham donon the jis ke parvane

vo sham-e-shabistan kaisi hai

o des se aane vaale bata

o des se aane vaale bata

marjana tha jis ka naam bata

vo ghuncha-dahan kis haal men hai

jis par the fida tiflan-e-vatan

vo jan-e-vatan kis haal men hai

vo sarv-e-chaman vo rashk-e-saman

vo sim-badan kis haal men hai

o des se aane vaale bata

o des se aane vaale bata

kya ab bhi rukh-e-gulrang pe vo

jannat ke nazare raushan hain

kya ab bhi rasili ankhon men

savan ke sitare raushan hain

o des se aane vaale bata

o des se aane vaale bata

kya ab bhi shahabi aariz par

gesu-e-siyah bil khate hain

ya bahr-e-shafaq ki maujon par

do naag pade lahrate hain

aur jin ki jhalak se savan ki

raton ke sapne aate hain

o des se aane vaale bata

o des se aane vaale bata

ab nam-e-khuda hogi vo javan

maike men hai ya sasural gai

doshiza hai ya aafat men use

kam-bakht javani Daal gai

ghar par hi rahi ya ghar se gai

khush-hal rahi khush-hal gai

o des se aane vaale bata

Leave a Comment