bana.e zehn parindon ki ye qatar mira
isi nazare se kuchh kam ho intishar mira
jo main bhi aag men hijrat ka tajraba karta
muhajiron hi men hota vahan shumar mira
phir apni ankhen saja.e hue main ghar aaya
safar ik aur raha ab ke ḳhush-gavar mira
tamam umr to ḳhvabon men kaT nahin sakti
bahut dinon to kiya us ne intizar mira
ye mera shahr miri ḳhamiyon se vaqif hai
yahan kisi ko na aa.ega e’tibar mira
ye log sirf miri zindagi ke dushman hain
mujassama ye bana.enge shandar mira
miri bisat se ‘az.har’ bahut ziyada thiin
tavaqquat jo rakhta tha mujh se yaar mira
Leave a Reply