Rajinder Manchanda Bani
ai dost main ḳhamosh kisi Dar se nahin tha
qaa.il hi tiri baat ka andar se nahin tha
har aankh kahin daur ke manzar pe lagi thi
bedar koi apne barabar se nahin tha
kyuun haath hain ḳhali ki hamara koi rishta
jangal se nahin tha ki samundar se nahin tha
ab us ke liye is qadar asan tha sab kuchh
vaqif vo magar sa.i mukarrar se nahin tha
mausam ko badalti hui ik mauj-e-hava thi
mayus main ‘bani’ abhi manzar se nahin tha
Leave a Reply